वीरगंज — वीरगंज महानगरपालिकाले पीएचडी उपाधि हासिल गर्न सफल वीरगंज–२३ निवासी राजु बैठालाई विशेष सम्मान गरेको छ।
बैठाले भारतको पञ्जाबस्थित आरआईएमटी विश्वविद्यालय (RIMT University) बाट राजनीति शास्त्र विषयमा पीएचडी उपाधि हासिल गरेका हुन्। उनले ‘Performance Evaluation of Birgunj Metropolitan Municipality: A Study of Selected Services’ शीर्षकमा डक्टरेट तहको अनुसन्धान सम्पन्न गरेका छन्।
आफ्नो समुदायबाट पीएचडी उपाधि हासिल गर्ने आफू पहिलो व्यक्ति भएको डा. बैठाले बताए। उनलाई वीरगंज महानगरपालिकाका प्रमुख राजेशमान सिंहले खादा लगाएर सम्मान गरेका हुन्।
सम्मान गर्दै महानगर प्रमुख सिंहले डा. बैठाको शैक्षिक उपलब्धिले वीरगंजको नाम देश–विदेशमा उज्यालो बनाएको बताए। उनले भने, “डा. बैठाले आफ्नो शैक्षिक उपलब्धिबाट महानगरको नाम देश–विदेशमा उज्ज्वल बनाएका छन्। उहाँलाई महानगरको तर्फबाट सम्मान गर्न पाउँदा हामी सबै गर्वान्वित छौं।
सम्मान कार्यक्रममा डा. बैठाले आफूले गरेको अनुसन्धानमा आधारित पुस्तकसमेत महानगर प्रमुख सिंहलाई हस्तान्तरण गरेका थिए।
डा. बैठाले आफ्नो अनुसन्धानमा वीरगंज महानगरपालिकाले नागरिकलाई प्रदान गर्दै आएका सार्वजनिक सेवाको कार्यक्षमता, प्रभावकारिता र परिणाममूलक पक्षको अध्ययन गरेका छन्। अध्ययनले स्थानीय सरकारको सेवा प्रवाहमा रहेका चुनौती तथा सुधारका सम्भावनाबारे तथ्यगत आधार प्रस्तुत गरेको छ।
महानगरपालिकाका प्रमुख प्रशासकीय अधिकृत वसन्तबहादुर बोहराले अनुसन्धानबाट प्राप्त निष्कर्ष महानगरपालिकाका लागि उपयोगी हुने बताए। अनुसन्धानले देखाएका विषयलाई आधार बनाएर सेवा प्रवाहमा आवश्यक सुधार तथा कार्यान्वयन अघि बढाउन सहज हुने उनको भनाइ थियो।
सम्मान ग्रहण गर्दै डा. बैठाले सबैबाट प्राप्त प्रेरणा, सहयोग र साथकै कारण आफू यो उचाइसम्म पुग्न सफल भएको बताए। उनले आगामी दिनमा पनि शिक्षा, अनुसन्धान र सामाजिक योगदानमार्फत क्षेत्रको विकासमा निरन्तर सक्रिय रहने प्रतिबद्धता व्यक्त गरे।
