वीरगंज , असोज ५ –
पर्साको पोखरिया नगरपालिका–१ का सुमन पासवानले आफूलाई ‘क्राइम ब्रान्च’को प्रहरी बताउँदै व्यापारीसँग रकम मागेको आरोप लागेको छ।
स्थानीयका अनुसार शनिबार कालिकामाई गाउँपालिका–३ नजिकै कुखुरा बोकेर साइकलमा आउँदै गरेका दुई व्यापारीलाई रोकेर पासवानले कागजात मागेका थिए। बिल देखाउँदा समेत च्यातेर रकम मागेको र रकम नदिएपछि प्रहरीले कुखुरा नियन्त्रणमा लिएको आरोप छ।
घटनाबारे जानकारी पाएपछि पोखरियाका कुखुरा व्यवसायीले पासवानलाई पहिचान गरी नियन्त्रणमा लिएका थिए। त्यसपछि इलाका प्रहरी कार्यालय पोखरियाको टोलीले उनलाई कार्यालयमा लगेको थियो।
पासवानले यसअघि पनि विभिन्न नाकामा आफूलाई ‘क्राइम ब्रान्च’को प्रहरी बताउँदै रकम माग्ने गरेको स्थानीय व्यापारीको आरोप छ। तर, इलाका प्रहरी कार्यालय पोखरियाका प्रमुख प्रहरी निरीक्षक भानुभक्त अर्यालले सोधपुछका क्रममा पासवानले रकम नउठाएको बताएपछि छाडिएको बताएका छन्।
