( ग्यासु मिया देवान )
बिरगंज | पर्सामा पछिल्लो समय आयुर्वेदिक औषधि तथा उपचारप्रति बिरामीहरूको आकर्षण बढ्दै गएको छ ।
विभिन्न स्वास्थ्य समस्याका कारण अस्पतालमा परीक्षण तथा एलोपेथिक औषधि सेवन गर्दा समेत अपेक्षित सुधार नभएका बिरामीहरू आयुर्वेदिक उपचारतर्फ आकर्षित हुन थालेका हुन् ।
पोखरिया नगरपालिका–७, रानीगञ्जमा रहेको आयुर्वेद औषधालयमा पछिल्लो समय उपचारका लागि आउने बिरामीहरूको चाप बढेको स्थानीय सेवाग्राहीहरुले बताए ।
औषधालयमा बिरामीहरूले निःशुल्क
स्वास्थ्य परीक्षण, उपचार तथा निशुल्क औषधि समेत पाउने भएकाले सेवाग्राहीको संख्या बढ्दै गएको स्थानीय बिरामीहरूले बताएका छन् ।
औषधालयका प्रमुख कविराज निरीक्षक धिरेन्द्र कुमार सिंहले बिरामीको स्वास्थ्य अवस्था र रोगको पहिचान गरी आयुर्वेदिक उपचार पद्धतिअनुसार आवश्यक औषधि तथा विभिन्न उपचार विधि प्रयोग गर्दै सेवा प्रदान गर्दै आएका हुन ।
उपचारका लागि औषधालयमा पुग्ने बिरामीहरूले आफूहरूले यहाँबाट नियमित रूपमा उपचार तथा औषधि प्राप्त गरिरहेको र स्वास्थ्यमा सुधार महसुस भएको बताएका छन् ।
आयुर्वेदिक उपचारप्रति स्थानीयवासीको विश्वास बढ्दै जाँदा आयुर्वेद औषधालयमा दैनिक बिरामीहरूको उपस्थिति समेत बढिरहेको जनाइएको छ ।
स्वास्थ्य क्षेत्रमा आयुर्वेदिक उपचारको महत्व बढिरहेका बेला ग्रामीण तथा स्थानीय तहमा रहेका यस्ता आयुर्वेद औषधालयबाट प्रभावकारी र सहज स्वास्थ्य सेवा उपलब्ध गराउन सके सर्वसाधारणलाई थप लाभ पुग्ने देखिन्छ ।
