बारा , असोज १७ –
बाराको कलैया उपमहानगरपालिका–१६ निवासी रुपेश कुमार रामले २० वर्षको उमेरमै लोकसेवा आयोगका विभिन्न पाँच परीक्षामा सफलता हासिल गरेका छन्। सरकारी विद्यालयबाट डिप्लोमा इन एनिमल साइन्स पूरा गरेका रामले छोटो समयमै प्रदेशदेखि संघीय लोकसेवासम्मका परीक्षामा सफलता पाएका हुन्।
रामका पाँच प्रमुख उपलब्धि यस्ता छन् :
१. गण्डकी प्रदेश लोकसेवा — पहिलो प्रयासमै वैकल्पिक
१८ वर्षको उमेरमा पहिलो प्रयासमै गण्डकी प्रदेश लोकसेवा आयोगको लिखित परीक्षा उत्तीर्ण गरी अन्तर्वार्तापछि वैकल्पिक सूचीमा स्थान बनाउन सफल भए।
२. १९ वर्षमै सरकारी सेवामा प्रवेश
त्यसपछिको वर्ष गण्डकी प्रदेश लोकसेवा आयोगबाट सहायक चौथो तहमा सिफारिस भई मनाङको नासो गाउँपालिकामा स्थायी नियुक्ति पाए।
३. कोशी प्रदेश लोकसेवामा खुलातर्फ पहिलो
कोशी प्रदेश लोकसेवा आयोगको सहायकस्तर पाँचौँ तहको परीक्षामा खुलातर्फ पहिलो नम्बरमा सिफारिस भए। उनी उद्योग, कृषि तथा सहकारी मन्त्रालय, कोशी प्रदेशमा सिफारिस भएका थिए।
४. संघीय लोकसेवाको खरिदारसरह पदमा पहिलो
संघीय लोकसेवा आयोगको खरिदारसरहको पदमा समेत उनले पहिलो नम्बरमा सफलता हासिल गर्दै स्थायी नियुक्ति प्राप्त गरे।
५. नायब सुब्बासरहको लिखित परीक्षा उत्तीर्ण
हालै संघीय लोकसेवा आयोगको नायब सुब्बासरहको पदको लिखित परीक्षा पनि उत्तीर्ण गरेका छन्। उक्त पदको अन्तर्वार्ता भने बाँकी रहेको छ।
सामान्य आर्थिक पृष्ठभूमिबाट आएका रामले अध्ययन र लोकसेवा तयारीलाई निरन्तरता दिँदै यी उपलब्धि हासिल गरेको बताएका छन्। उनको सफलताले सरकारी सेवाको तयारी गरिरहेका युवाका लागि निरन्तर अध्ययन र प्रतिस्पर्धात्मक तयारीको महत्व देखाएको छ।
