पर्सा , असोज २ –
पर्साको ग्रामीण क्षेत्रमा खसी–बाख्रा चोरीका घटना बढ्न थालेपछि पशुपालक चिन्तित बनेका छन्। स्थानीयका अनुसार खसी–बाख्रा किन्ने बहानामा गाउँ पुग्ने र मौका छोपेर चोरी गर्ने समूह सक्रिय छन्।
पछिल्लो घटना सखुवाप्रसौनी गाउँपालिका–४ ओझैया प्रसौनीमा भएको छ। स्थानीय शम्भु साह सोनारको करिब ३०–३५ किलो तौल र २० हजार रुपैयाँ मूल्यको खसी प्रसौनी–सोलकपुर सडकखण्डमा चरिरहेका बेला दुई जना मोटरसाइकल सवार व्यक्तिले उठाएर लगेका छन्।
सोनारले आफ्नै आँखाअगाडि खसी लिएर भागेकाहरूलाई समात्ने प्रयास गरे पनि सफल नभएको र मोटरसाइकल नम्बरसमेत टिप्न नसकेको बताएका छन्। स्थानीयले पशुचौपायाको निगरानी बढाउन र शंकास्पद गतिविधिबारे तत्काल प्रहरीलाई जानकारी गराउन आग्रह गरेका छन्।
साभार:
घण्टाघर टिभी
