बारा, कार्तिक १७ –
बाराको जितपुरसिमरा उपमहानगरपालिका–१६ धर्मनगरमा बाँदर धपाउन भरुवा बन्दुक पड्काउँदा छर्रा लागेर एक जना घाइते भएका छन् ।
सोमबार साँझ करिब ६ः३५ बजे स्थानीय ३० वर्षीय गोविन्द ठाडा मगरले बाँदर धपाउने क्रममा भरुवा बन्दुक पड्काउँदा निस्किएको छर्रा लागेर सोही ठाउँका ३२/३३ वर्षीय उत्तम रमौली मगर घाइते भएका हुन् ।
घाइते रमौलीको वीरगंजस्थित नेपाल मेडिसिटी बयोधा अस्पताल, गण्डकमा उपचार भइरहेको प्रहरीले जनाएको छ ।
घटनाबारे जानकारी पाएलगत्तै जिल्ला प्रहरी कार्यालय बाराबाट प्रहरी नायब उपरीक्षक मीनबहादुर घलेको कमाण्डमा खटिएको टोली, डुमरवाना अस्थायी प्रहरी पोस्ट र इलाका प्रहरी कार्यालय सिमराबाट थप प्रहरी टोली घटनास्थल पुगेको थियो ।
प्रहरीले घटनामा संलग्न गोविन्द ठाडा मगरलाई दुई नाल भरुवा बन्दुकसहित नियन्त्रणमा लिएको छ । घटनाबारे इलाका प्रहरी कार्यालय सिमरा, बाराबाट थप अनुसन्धान भइरहेको प्रहरीले जनाएको छ ।
