जनकपुरधाम , असोज १८ –
चालु आर्थिक वर्ष २०८३/८४ को पहिलो दुई महिना साउन र भदौमा मधेस प्रदेशमा विपद्का ४५९ वटा घटना भएका छन् । ती घटनामा परी ९२ जनाको मृत्यु भएको छ भने ५१० भन्दा बढी परिवार प्रत्यक्ष प्रभावित भएका छन् ।
मधेस प्रदेश प्रहरी कार्यालय जनकपुरधामका अनुसार विपद्मा मृत्यु हुनेमा ४७ पुरुष, १९ महिला र २६ बालबालिका छन् । विपद्का घटनामध्ये करेन्ट लागेर मृत्यु हुनेको संख्या सबैभन्दा बढी रहेको छ । दुई महिनामा करेन्ट लागेर मात्रै ३९ जनाले ज्यान गुमाएका छन् ।
त्यस्तै, नदी, पोखरी तथा गड्ढामा डुबेर २९ जना, जङ्गली जनावरको आक्रमणबाट ५ जना, चट्याङबाट ३ जना र आगलागीबाट १ जनाको मृत्यु भएको छ । अन्य प्रकृतिका विपद्मा परी १३ जनाको मृत्यु भएको प्रहरी तथ्याङ्कमा उल्लेख छ ।
प्रहरीका अनुसार पानीमा डुब्ने तथा करेन्ट लाग्ने घटनामा बालबालिका बढी जोखिममा परेका छन् । दुई महिनामा आगलागीका ११२ र करेन्टका १०७ घटना भएका छन् । यसैगरी पानीमा डुब्ने ३७, जङ्गली जनावरको आक्रमणका ३२, बाढीका १२ र चट्याङका १० वटा घटना भएका छन् ।
विपद्का कारण प्रदेशभर २ करोड ९२ लाख ४७ हजार ५५५ रुपैयाँ बराबरको भौतिक क्षति भएको छ । आगलागीबाट मात्रै २१२ परिवारका घर नष्ट भएका छन् भने २ करोड ७० लाख १३ हजार ३५० रुपैयाँ बराबरको धनमाल जलेर नष्ट भएको प्रहरीको तथ्याङ्क छ ।
विपद्मा परेका नागरिकको उद्धार, खोजी तथा राहत व्यवस्थापनका लागि दुई महिनाको अवधिमा मधेस प्रदेशभर २ हजार ८६९ जना प्रहरी परिचालन गरिएको मधेस प्रदेश प्रहरी कार्यालयका प्रवक्ता एवं एसएसपी प्रभुप्रसाद ढकालले जानकारी दिए ।
प्रहरीले असार, साउन र भदौमा खोलानालामा पानीको बहाव बढ्ने तथा पोखरी, खाल्डाखुल्डी र अन्य जलाशयमा पानी जम्ने भएकाले विशेष सावधानी अपनाउन आग्रह गरेको छ । साथै करेन्ट र आगलागीबाट हुने क्षति न्यूनीकरणका लागि स्थानीय तह तथा समुदायस्तरमा पूर्वसावधानी, जोखिम पहिचान र जनचेतनामूलक कार्यक्रमलाई प्रभावकारी बनाउनुपर्नेमा प्रहरीले जोड दिएको छ ।
