बारा,१२चैते : डिफेन्डिङ च्याम्पियन न्युरोड टिम एनआरटी १–० को संघर्षपूर्ण जित निकाल्दै बाराकाे सिमरामा जारी जितपुर–सिमरा गोल्डकप फुटबलको सेमिफाइनलमा प्रवेश गरेको छ ।
आइतबार बेलुकी भएकाे खेलमा
वीरगन्ज युनाइटेड क्लब विरुद्ध एनआरटीका लागि एक मात्र निर्णायक गोल अशोक थापाले गरे । खेलको २९औँ मिनेटमा कृतिशरत्न चुन्जुले डिबक्सभित्र निकालेको क्रसपासलाई सदुपयोग गर्दै अशोकले उत्कृष्ट गोल गरेका हुन् ।
घरेलु दर्शकको समर्थन पाएको वीरगन्ज युनाइटेडले खेलमा केही आकर्षक अवसर बनाए पनि फिनिसिङमा चुक्दा १-० काे हार व्यवाेर्दै प्रतियोगिताबाट बाहिरिन पुगेकाे छ । खेलको ४८औँ मिनेटमा वीरगन्जका विवेक चौधरी वन भर्सेस वनको स्थितिमा चुक्न पुगे । विवेकको प्रहार गोलपोष्टनजिकबाट बाहिरियो ।
पहिलो हाफ नियन्त्रणमा लिएको एनआरटीविरुद्ध वीरगन्जले दोस्रो हाफमा सुधारिएको खेल प्रस्तुत गरेकाे थियाे। दोस्रो हाफको सुरुबाटै एनआरटीविरुद्ध आक्रामक खेल खेले पनि वीरगन्जले स्कोर भने बनाउन सकेन ।
खेलको ५४औँ मिनटमा वीरगन्जले एनआरटीविरुद्ध बराबरी गोल गर्ने आकर्षक अवसर गुमायो । वन भर्सेस वनको स्थितिमा वीरगन्जका कृपा गोल गर्न चुके । कृपाले पेनाल्टी एरियाबाट फितलो प्रहार गर्दा एनआरटीका गोलरक्षक पुजन होनाले सहज बचाउ गरे ।
दोस्रो हाफको इन्जुरी समयको अन्तिम मिनेटमा वीरगन्जले अर्को अवसर खेर फाल्यो । कृपा चौधरीले किपरसमेत बिट भइसकेको अवस्थामा गोल गर्न सकेनन् । पेनाल्टी एरियाबाट कृपाले गरेको प्रहार गोलपोष्ट नजिकबाट बाहिरियो ।
प्रतिष्पर्धात्मक खेलमा एनआरटीले पनि केही आकर्षक गुमाएको थियो, जसकारण वीरगन्जविरुद्ध जित निकाल्न अन्तिम समयसम्म कडा संघर्ष गर्नुपरेको थियो । खेलको सातौँ मिनेटमा कृतिरत्न चुन्जुको क्रसपासमा अशोक थापाको प्रहार गोलपोष्ट नजिकबाट बाहिरिएको थियो ।
खेलको ६४औँ मिनटमा अशोक थापाले किपरसमेत बिट भइसकेको अवस्थामा गोल गर्न सकेनन् । उनको प्रहार वीरगन्जका डिफेन्डरले गोललाइनबाट क्लिएर गरेका थिए ।
एनआरटीलाई अन्तिम चारमा पुर्याउन निर्णायक गोल गरेका अशोक थापा खेलको म्यान अफ दि म्याच घोषित भए । उनले दशहजार नगदसहित ट्रफी प्राप्त गरे । प्रतियोगिताअन्तर्गत सोमबार सातदोबाटो युथ क्लब र हिमालयन शेर्पाबीच तेस्रो क्वार्टरफाइनल खेल हुनेछ । साभार:नयाँपत्रिका
The post सिमरा गाेल्डकप : वीरगन्जलाई हराउँदै एनआरटी सेमिफाइनलमा appeared first on Madhes Khabar.
साभारः मधेसखबर
प्रतिक्रिया